A compdar d'aguest deluns, en tot entrar era Val d'Aran ena fasa 3 de desescalada der estat d'alarma vigent, eth Palai de Gèu de Vielha torne a aufrir es activitats dirigides ena sua installacion, mès damb cèrtes limitacions.

Damb un maxim de 20 persones per session, se pòt tornar a gaudir de: Iòga, Body Workout, Hiit, Burn Fat, EFM, Tonofit, Powerdumb, Stretching (peth maitin). Damb un maxim de 10 persones: Spinning e Stretching (pera tarde). Rythmic Bounce damb un maxim de 9 persones per session, e es activitats d'Aquasalut e Aquafit damb un aforament maxim de 4 persones ath viatge.

Totes aguestes activitats dirigides seràn disponibles sonque entàs abonats e s'aurà de demanar cita prealabla en tot trucar ath telefòn deth Palai de Gèu, 973642864.

Atau madeish, tanben s'a establit un aforament maxim ena rèsta d'espacis der equipament: 8 ena sala de pes liure, 40 en gimnàs, 8 en rocòdrom, 30 enes vestiaris, 18 en vas gran (piscina interiora), 4 en vas petit (piscina interiora), 4 ena pista de fronton e 4 ena pista de pàdel.  Cau remercar que entà poder accedir ara sala de pes liure, e es pistes de pàdel e fronton calerà sollicitar cita prealabla, mentre que entara rèsta d'espacis non serà de besonh.

Tanben ei important rebrembar qu'ena fasa 3 se mantien es mesures de seguretat e d'igiene vigentes entath corrècte emplec dera installacion, en tot previer possibles contagis dera COVID-19. En aguest sens, ei de besonh portar era mascareta en tot transitar pes espacis comuns e en moment de recuélher e tornar es claus dera pista de pàdel e de fronton. Entà accedir ath gimnàs, es sales o eth rocòdrom calerà portar era toalha e sabatilhes esportives de recambi o pès de gat. Tanben calerà laurar-se es mans damb gel antiseptic en començar era activitat e s'evitarà eth contacte fisic entre es usatgèrs. Atau madeish, se poderàn emplegar es duches des vestiaris.

“Damb era entrada de Vielha e Mijaran e eth conjunt dera Val d'Aran ena fasa 3 de desescalada, recuperam cada viatge mès era normalitat ena nòsta societat. En aguest sens, ei ua grana notícia poder tornar a gaudir des activitats dirigides en Palai de Gèu, en tot respectar un cèrt limit d'aforament e es mesures de seguretat e igiene vigentes”, comente eth baile de Vielha e Mijaran, Juan Antonio Serrano. E hig que “non mos podem relaxar. Era fasa 3 mos permet melhorar es servicis qu'aufrim enes equipaments deth municipi, mès auem de respectar es directritzes que mos arriben des der Estat, se volem gaudir sense perilh d'aguestes activitats esportives e evitar possibles repunts dera COVID-19”.

HÒNT: AJUNTAMENT DE VIELHA E MIJARAN