Era setzau etapa deth Tour de França, damb un inici controvertit pera zòna de Carcassona a causa d'ues manifestacions de pagesi francesi, a passat pera Val d'Aran entà desbocar en Luchon, era meta.

Un recorregut en qué eth Portilhon a estat eth tram decisiu entà diboishar eth pòdium dera jornada. D'aguesta forma, eth pòble de Bossòst a mostrat ua estampa pòc abituau: parcatges enaiguadi de caravanes e otèls e restaurants pleï a vessar.

Tot e que pendent era caravana publicitària ploiguec un shinhau, damb eth pas des menutes es paraigües passèren a èster de besonh entà caperar-se deth fòrt solei que ludec en cèu.

Segons er Ajuntament, era jornada aurie acuelhut apuprètz uns 10.000 visitants entre era localitat e eth pòrt deth Portilhon, ei a díder, eth municipi aurie multiplicat era sua poblacion per 9 pendent ues ores.

Maugrat que cada còp es visitants estrangèrs son mès quantiosi, es vesins francesi e es nacionaus contunhen en tot conformar eth celh des visitants.

En aguesta etapa, eth francés Alaphilippe s'emportèc era victòria mentre eth basc Gorka Izagirre podec obtier er argent en aguest dur recorregut de 218 quilomètres. Fin finau, eth britanic Yates quedèc en tresau lòc.