Era candidatura Pirenèus-Barcelona 2030: ua illusion blanca

22/10/2018

Es rumors qu’era Val d'Aran poirie èster scenari candidat entà acuélher es jòcs olimpics d'iuèrn deth 2030 se confirmauen quan en seteme, eth consultor deth Comitat Olimpic Internacionau Gilbert Felli, visitaue Catalonha. Era candidatura Pirenèus-Barcelona se convertie alavetz en ua apòsta mès fòrta.

Era següenta accion siguec convocar es bailes de toti es pòbles aranesi entà verificar qu'eth projècte auie supòrt institucionau. Ua amassada ara que i assistic eth president dera Reiau Federacion Espanhòla d'Espòrts d'Iuèrn.

Eth resultat dera amassada, contondenta: unanimitat per part de toti es actors politics. Hè dues setmanes, ua auta bona notícia: eth Comitat Olimpic Internacionau avalaue era candidatura Pirenèus-Barcelona entà que comencèsse a trabalhar en ua prepausa concrèta pera organizacion des Jòcs d'Iuèrn der an 2030.

D'auta banda, es naui critèris der organisme internacionau priorizen aqueres candidatures que practicaments ja dispòsen des infrastructures de besonh entà poder organizar es Jòcs. Tot açò damb er objectiu d'evitar còsti extraordinàris. Mès, compde era Val d'Aran damb aguesti equipaments?

Un aute argument de pes entà deféner era candidatura ei era qualitat des esportistes deth país. En aguest sens, era Reiau Federacion Espanhòla d'Espòrts d'Iuèrn harà plan lèu era presentacion des sues equipes e seleccions, damb es sòns melhors esportistes d'iuèrn.

Un des eveniments  mès demorats ena pròplèu sason de nhèu en Baqueira/Beret ei era Copa deth Mon de snowboard cross FIS, que debanarà en març.

Laura Rodríguez