Er Espitau Val d'Aran dejà pòt realizar pròves PCR e tests serologics en sòn laboratòri

04/06/2020

Dempús de diuèrses gestions amiades a tèrme e des cambis enes protocòls existents, er Espitau Val d’Aran dejà pòt realizar es pròves PCR e es tests serologics en sòn laboratòri. Quauquarren que permeterà auer informacion de forma mès rapida tà reaccionar damb agilitat en cas d’auer de préner naues mesures de proteccion.  

Arrebrembam qu’enquia ara, aguestes mòstres se portauen a analizar en laboratòri der espitau Arnau de Vilanova pr’amor qu’en Aran non se compdaue damb es recorsi de besonh.

Es pròves PCR, que son es que detecten era infeccion dera malautia, sonque se realizaràn en casi d’urgéncia.

En çò que tanh as pròves que detecten era existéncia d’anticòssi, es pròves serologiques, se practicaràn jos era prescripcion deth mètge de capçalèra. 

Es indicacions entà cadua d’aguestes pròves an estat definides e consensuades damb eth Servici de Vigilància Epidemiologica deth Departament de Salut dera Generalitat de Catalunya. En aguest sens, toti es professionaus sanitaris deth Conselh Generau d’Aran an recebut era informacion ath respècte.

Laura Rodríguez