Pendent er 1 e eth 6 d'abriu, Vielha e Mijaran acuelherà desparières activitats entà commemorar eth Dia Mondiau dera Activitat Fisica. Entà celebrar aguesta hita, er Ajuntament de Vielha e Mijaran a premanit un seguit d'activitats esportiues e de salut gratuïtes en diuèrsi endrets de Vielha, jos eth lèma “Pera tua salut, botja-te!, ena que se vò encoratjar ara gent a que pogue amiar a tèrme un minim de 30 menutes d'espòrt ath dia.

En aguest sens, Vielha e Mijaran s'ahig, un an mès, ath calendari d'activitats que hèn part deth Plan d'Activitat Fisica Espòrt e Salut dera Generalitat de Catalunya a compdar de 2005, qu'a coma objectiu difóner es recomanacions d'activitat fisica entà auer ua bona salut e arténher qu'era poblacion sigue mès activa.

Entà començar, deluns 1 d'abriu, eth Palai de Gèu acuelherà era activitat HIIT (High Intensity Interval Training), damb ua session entre es 20:10 e es 20:55, ena que se preten melhorar era resisténcia e cremar grèish. E ena Plaça dera Glèisa i aurà ua gessuda de Marcha Nordica (Nivèu Sportive) entre es 18:00 e es 21:00.

Dimars 2 d'abriu en Palai de Gèu s'amiarà a tèrme ua session de Bollywood Fitness entre es 17:30 e es 18:30 e ua de zumba entre es 20:05 e es 20:50. Ath delà, en Palai d'Espòrts se dauriràn es pòrtes entà practicar tennis taula, badminton e basquet entre es 19:30 e es 21:30. E i aurà ua gessuda de Marcha Nordica (Nivèu Healthy) entre es 18:00 e es 20:00.

Dimèrcles 3 d'abriu, en Palai de Gèu s'amiarà a tèrme ua session de Powerdumb entre es 19:10 e es 19:55 e en Palai d'Espòrts se poderà jogar a fotbòl sala entre es 19:30 e es 21:30.

Dijaus 4 d'abriu, eth Palai de Gèu acuelherà ua session de Iòga entre es 15:20 e es 16:40 e ua de Bollywood Fitness entre es 19:00 e es 20:00. En Palai d'Espòrts se poderà jogar a tennis taula, badminton, basquet e vòlei entre es 19:30 e es 21:30 e i aurà ua gessuda de Marcha Nordica (Nivèu Healthy) entre es 18:00 e es 20:00.

Diuendres 5 d'abriu i aurà ua session d'Aquasalut enes piscines interiores deth Palai de Gèu, e en Casau deth Jubilat s'amiarà a tèrme ua session de Coordinacion-Respiracion e Moviment entara gent grana entre es 17:30 e es 18:30.

Fin finau, dissabte 6 d'abriu, qu'ei quan se celèbre oficiaument eth Dia Mondiau dera Activitat Fisica, i aurà ua gessuda de Marcha Nordica (Nivèu Sociau) entre es 09:30 e es 13:30 entà barrar es actes d'enguan.

 HÒNT: AJUNTAMENT DE VIELHA E MIJARAN