Es corredores deth Club Aranés Espòrts d’Iuèrn (CAEI), Clara Albert e Júlia Bargalló se proclamèren guanhadores des dus GS dera XXIIIau edicion deth Top CAEI-FIS. Júlia guanhèc eth GS deth dissabte e Clara eth deth dimenge.

130 corredors de tota Espanha e de diuèrsi païsi mès coma França, Andòrra, Chile o Portugal se dèren cita aguesta dimenjada passada ena estacion aranesa de Baqueira-Beret entà participar ena XXIIIau edicion deth Trofèu Internacionau TOP-CAEI FIS dera categoria CIT.

En aguesta competicion, organizada peth CAEI, auien de disputar dus GS entà òmes e dames ena pista Stadium en sector de Beret, mès es condicions non permeteren qu'eth dimenge se podesse realizar tota era competicion; era bruma empedic que se disputèsse eth GS ena categoria masculina.

Era organizacion premièc as tres prumèrs Absoluts e as tres prumèrs dera categoria CIT, ei a díder as corredors/es que non formen part de cap equipa nacionau o centre de tecnificacion, òmes e dames, damb ua cistalha de productes dera Val d’Aran en un liurament de trofèus que s'amièc a tèrme en madeish Plan de Beret.

HÒNT: CONSELH GENERAU D'ARAN