Er aranés Alex Puente se proclamèc ager guanhador ena pròva de Slalom dera Copa Itàlia FIS, per deuant der italian Pietro Franceschetti (+0,32) e eth rus Simon Efimov (+0.50).

D'aguesta forma, Puente obten 14,43 punts FIS, damb çò qu'iguale era tresau milhor mèrca personau dera sua carrèra esportiua.

Cau destacar qu'aguesta victòria precedís ara artenhuda eth passat 13 de deseme, ena pròva de Gigant FIS celebrada en Davos, Soïssa, e dempús d'èster 3 setmanes sense poder entrenar, a causa dera lesion de cavilha sofrida pendent eth GS FIS de Gressoney, en Itàlia.

Damb aguesta dusau victòria dera sason, ja son ueit es victòries der esquiaire aranés en pròves FIS.

Alex Puente se desplaçarà a Soïssa entà entrenar Slalom Parallel damb es sòns companhs Juan del Campo e Kim Salarich, a on premaniràn era Copa d'Euròpa, que se disputarà aguest diuendres, 1 de hereuèr, en Tignes (França). Ena aguesta pròva, Alex ei er esquiaire espanhòu milhor classificat, actuauments ena 33au posicion.