Era sason deth fotbòl sala en Vielha e Mijaran

12/06/2019

Eth municipi de Vielha e Mijaran assolide ua fòrta aufèrta de fotbòl sala pendent aguesta primauera.

En Pasca, eth torneg femenin de fotbòl sala encetèc aguest cicle d'eveniments damb era celebracion dera sau 9au edicion.

En mai, era AEFA Cup inicièc ua liga damb un totau de 10 equips locaus, que s'esten pendent eth mes de junh.

En aguest mes de junh auem eth torneg infantil Objectiu 30 Ores de fotbòl sala, damb 6 equips, a on es mès joeni cerquen guanhar ua competicion que les servirà entà poder disputar en futures edicions eth torneg des 30 Ores de Fotbòl Sala Vila de Vielha, qu'enguan a lòc es dies 15 e 16 de junh. Aguest ei eth torneg classic de fotbòl sala en municipi pendent era primauera, damb era participacion d'equips aranesi, atau coma de Lleida e de diuèrsi punts de Barcelona. Enguan aguesta competicion artenh ja era 12au edicion.

Eth fotbòl sala ei un des espòrts que mès participacion atrè en Vielha e Mijaran e supause era confirmacion deth bon moment que trauèsse er espòrt en municipi, e qu'assolide eth Palai d'Espòrts de Vielha coma punt d'amassada des amants d'aguesta e d'autes practiques esportiues.

“Pendent es darrèri ans auem artenhut qu'eth Palai d'Espòrts sigue un  equipament fòrça actiu, a on acuelhem un pialèr d'activitats esportiues, coma ei eth cas deth fotbòl sala, e a on s'a enregistrat un aument dera participacion en mès d'un 50% en conjunt d'aguestes activitats”, comente eth còsso d'Espòrts der Ajuntament de Vielha e Mijaran, Alberto López. E hig que “ara ei eth fotbòl sala, mès pendent tot er an auem ua grana diuersitat d'espòrts que se pòden practicar en aguesta installacion, en tot fomentar ua excellenta participacion autant des mès joeni coma des adults arribadi de diuèrsi endrets deth conjunt dera Val d'Aran e tanben de dehòra. Un equipament, per tant, damb ua grana importància a nivèu esportiu e sociau”.

Hònt: Ajuntament de Vielha e Mijaran

Clara Villar