Er Ajuntament de Vielha e Mijaran renauirà er enlumenat deth Palai d'Espòrts e deth Centre Polivalent en tot plaçar-i un sistèma de lums LED

19/01/2021

Er Ajuntament de Vielha e Mijaran a adjudicat era licitacion entà renauir er enlumenat deth Palai d'Espòrts e deth Centre Polivalent de Vielha. Ua intervencion que permeterà, a trauès dera installacion d'un sistèma de lums LED, ua melhora dera qualitat der enlumenat d'aguesti equipaments esportius municipaus, atau coma amendrir eth consum energetic pendent eth sòn emplec.

En çò que tanh ar enlumenat deth Palai d'Espòrts, aguest compde damb un totau de 32 campanes industriaus, des quaus un totau de 7 unitats an es ampoles honudes. Damb aguest actuacion se substituiràn aguestes campanes en tot installar-ne ues LED dessenhades especiaument entà airaus industriaus, damb proteccion dera lent de policarbonat, de melhor rendiment e menor consum. Era poténcia unitària enquiara ei de 400w, e passaràn a èster de 200w.

Toti aguesti cambis s'amien a tèrme en tot garantir qu'er equipament complís damb es normatives vigentes en çò que tanh ar enlumenat d'installacions esportiues (UNE-EN) e NIDE (Consejo Superior de Deporte). En aguest cas, coma installacion de tipe 2 (competicions de nivèu miei, partits de competicion regionaus e locaus).

Era execucion d'aguesta intervencion compde damb un pressupòst finau de 13.499,70€.

En cas deth Centre Polivalent, ara madeish i a 8 luminàries de tipe incandescent damb un naut consum energetic. Atau madeish, er estudi d'illuminància realizat en espaci determinèc qu'ei insufisenta entara practica esportiua. Per tant, s'installaràn luminàries damb major rendiment entà auer un enlumenat avient, en tot melhorar-ne eth consum energetic. S'i plaçarà ua campana industriau LED, tanben damb proteccion dera lent de policarbonat.

En çò que tanh as normatives d'enlumenat d'installacions esportiues, eth Centre Polivalent ei plaçat ena categoria de tipe 3 (entrenament generau, educacion fisica e activitats recreatiues).

Era execucion d'aguesta intervencion compde damb un pressupòst finau de 7.033,50€.

HÒNT: AJUNTAMENT DE VIELHA E MIJARAN

 

 

 

Laura Rodríguez