Per quatau còp en mès de dus ans, un nau recors judiciau frene era resolucion deth concors public entara naua concession tà poder gestionar es dètz depuradores d'aigües residuaus dera Val d'Aran, qu'aurà de demorar tres mesi mès. 

Era actuau enterpresa concessionària, Isolux, a recorrut er acòrd deth Plen deth Conselh deth passat mes de març, a on s'autregèc era adjudicacion provisionau d'aguestes installacions ara UTE formada pes enterpreses Acsa, Agricultores de la Vega de Valencia e Depuración de Aguas del Mediterráneo per 7,2 milions d'euròs pendent ueit ans, prorrogables a dus mès. 

En Plen deth Conselh celebrat aué madeish s'a ratificat un informe sus eth nau recors ara adjudicacion, qu'includís es dues depuradores de Canejan, e es d'Arròs, Aubèrt, Bagergue, Bossòst, Escunhau-Casarilh, Les, Naut Aran e Vielha.

Isolux, qu'encara seguís gestionant aguestes installacions damb un contracte prorrogat des der an 2013, optèc ath nau concors, en quau quedèc excludida per non complir damb es critèris de solvabilitat economica qu'exigissen es bases. Per aguest motiu, presentèc recorsi deuant era administracion e eth Tribunau Superior de Justicia de Catalonha, un procés qu'encara non s'a resolvut des de març de 2015. 

 

IMATGE: DIARI SEGRE