Eth departament de Governacion, Administracions Publiques e Abitatge dera Generalitat de Catalonha a anonciat que cofinaçarà damb 7,5 milions d'euròs un totau de 6 projèctes impulsadi per administracions locaus dera província de Lhèida.En cas dera Val d'Aran, eth departament autrejarà 657.862,41 € ath Conselh Generau d'Aran entara milhora dera accessibilitat as espacis naturaus. Segontes a comunicat aguest departament, eth cofinançament ei destinat a un projècte entà ua milhora substanciau des accessi as espacis naturaus de naut valor ecologic e era promocion e difusion des recorsi toristics as quaus se lis da er accès. I participen toti es municipis deth territòri damb er objectiu de dar valor e potenciar eth dinamisme des airaus naturaus e culturaus dera zòna, d'incalculable valor païsatgistic, patrimoniau e istoric. Se presenten un conjunt d'intervencions que pemeteràn milhorar er accès a diuèrsi airaus naturaus especiauments protegidi damb especiau atencion as besonhs des persones damb mobilitat redusida. 

D'aute biais, ara Diputacion de Lhèida se li a autrejat un totau d'1.855.641,28 € entath projècte "Forest4local" tà articular un sistema de gestion forestau des bòsqui entara mobilizacion de biomassa forestau entà usatges termics en bastisses e equipaments publics des comarques de nauta montanha. Ath delà, era Val d'Aran tanben ei includida laguens d'aguest projècte. 


IMATGE: Uelhs deth Joèu