Es ossardets Indu, Misha e Trona abandonaràn Aran Park, eth parc de flòra e fauna de Bossòst, entre mieis e finaus de març, segontes hònts deth pròpi parc. Es tres petits, neishudi er an passat en aguest espaci de semi-libertat, seràn trasladats ath Parc Animalier des Pyrénees ena poblacion francesa d’Ayzac-Ost.

Segontes Gemma Segura, educadora ambientau d’Aranpark, “eth principau motiu d’aguest traslat ei qu’eth barratge ei petit entà cinc ossi”, entara pròpia comoditat des animaus ei preferible eth sòn traslat. Ath delà tanben existís eth problèma de que Indu, un des tres ossardets, ei mascle e eth sòn pare veirie ath petit coma un competidor quan era femelha torne a entrar en calor e de ben segur que acabarie atacant-lo.

Degut as elevats neishements d’ossi en captivitat que se produsissen en tot er estat (e era dificultat entà trapar-les naui parcs a on plaçar-les) er os mascle d’Aran Park serà esterilizat entà que non pogue auer mès hilhs e evitar aguestes situacions.

Aran Park daurirà de nau es sues pòrtes a prumèrs d’abriu. Er orari, coma tostemp, serà de 9 deth maitin enquias 6 dera tarde en tempsada baisha e es mesi de juriòl e agost enquias 7 dera tarde. Rebrembam tanben qu’eth parc compdarà damb un nau atractiu: es quate exemplars de lop europèu qu’abiten desde gèr d’aguest an.  


IMATGE E VIDEO: ARAN PARK