Era mainadèra de Vielha celebre eth passavila de magràs

24/02/2017

Pendent era dimenjada i a organizades diuerses activitats e hèstes de d isfrassi entà grans e petits

Era Escòla Garona e era Escòla Mairau “Era Cunhèra” de Vielha an celebrat dejà eth sòn tradicionau passavila infantil de magràs. Dempús d’ua divertida setmana d’ofrendes a magràs en estudi, aué, a compdar des 10 deth maitin, era mainadèra a gessut ath carrèr damb es sòns disfrassi acompanhadi d eth grop d’animacion musicau “Sac Espectacles”, aufrit per Ajuntament de Vielha e Mijaran.

Damb musica e balhs, es mainatges e mainades d’educacion infantila e primària de Vielha an recorrut es avengudes Pas d’Arró e Castièro enquia arribar ena rotonda de Gausac e, de tornada, an parat ena plaça dera Glèisa entà realizar eth judici ath pipòt de magràs.

Enguan, era tematica dera Escòla Garona an estat es supereròis e s’a pogut veir as petits damb disfrassi de Batman, Superman, Spiderman o Capitan America, entre d’auti. Seguint era tematica, magràs anaue caracterizat de Darth Vader e a estat condemnat pes alumnes de cincau de primària a cremar-se per totes es causes dolentes que succedissen en mon.

Dempús dera crema deth pipòt ena plaça dera Glèisa, era AMPA a aufrit a toti es assistents un esdejoar entà recuperar fòrces. Tot e que magràs ja a cremat, era hèsta contunharà pendent aguesta tarde e tota era dimenjada ena Val d’Aran.
Clara Villar