Es trebalhadors dera Brigada Municipau d’Òbres e Servicis der Ajuntament de Bossòst  inicièren, hè ues setmanes, es trebalhs de recuperacion der antic Camin de Casteret (tanben conegut coma Camin de Margalida).

Aguest camin, que comence en Cledes, istoricament daue accés as Mines de Margalida. Era sua particularitat residís en qu’ei ua via de montanha damb parets de pèira seca, de grana extension e amplor e enes sues espectaculars e permanents vistes ath pòble de Bossòst.

Era via quedèc barrada pendent molti ans pera gran quantitat de vegetacion que barraue eth pas as senderistes.

Segontes eth Baile deth consistòri, Amador Marqués, aguest camin “ei un des mès valorats dera Val d’Aran pes sòns valors patrimoniaus, naturaus e istòrics, e volem que se convertisque en un nau atractiu senderistic entà accedir ath paratge de Margalida, ara Montanha d’Estanh Long e, en darrèr tèrme, ath Montlude, establint diferents nivèus d’esfòrç en tot promòir ua naua ruta ath torn de Bossòst”.

Es trebalhadors municipaus an dubèrt dejà ath torn de dus quilomètres d’aguest camin, que se somen as auti dus deth prumèr tram qu’er an passat netegèren es trebalhadors des Servicis Mieiambientaus deth Conselh Generau d’Aran.

IMATGES: AJUNTAMENT DE BOSSÒST