Pendent eth darrèr plen deth Conselh Generau d’Aran, celebrat aguest maitin, s’a aprovat per unanimitat establir ua regulacion ena liure circulacion de veïculs motorizats qu’afectarà cada an ath tram qu’unís era poblacion d’Es Bòrdes e eth Plan dera Artiga a partir dera dusau quinzena deth mes de junhsèga enquia era prumèra quinzena deth mes de seteme.

Entà garantir era mobilitat en aguesta zòna, pendent es mesi a on ar accès motorizat sigue restringit se compdarà damb eth servici deth tren toristic que dejà comencèc a foncionar er an passat.

Ath delà, tanben se recuperarà enguan un antic camin que passe peth bòsc e qu’arribarà des deth madeish parcatge enquia es Uelhs deth Joèu.

Des deth Conselh Generau se preten tanben poder installar enguan eth Centre d’Interpretacion dera Artiga de Lin, que dejà compde damb un finançament d'apuprètz 90.000 euròs.

Aguesta decision ven dempús dera pròva pilòt realizada er an passat qu’evitèc qu’uns 8.500 veïculs passèssen per aguest tram dera pista, e qu’a agut ua avaloracion fòrça positiua en aguest darrèr Plen deth Conselh.