Dejà s’a signat eth contracte de cession der hons deth fotògraf aranés, Toni Estany, ar Archiu Generau d’Aran en ua reunion ara qu’an assistit era directora der Archiu, Maria Pau Gómez, eth Síndic d’Aran, Carlos Barrera, e era hemna deth madeish Toni Estany, Maria José González.

Un totau de 30.000 imatges (compdant es negatius e es positius) que, segontes eth Síndic, son “de grana importància e interès, un recuelh d’imatges dera natura, era flòra e era fauna dera Val d’Aran. Des deth Govèrn d’Aran arregraïm era responsabilitat e era generositat de voler qu’aguest patrimòni sigue conservat enes melhors condicions en Archiu Generau d’Aran”.

Rebrembam qu’eth trebalh mès important de Toni Estany ei eth que se centre enes insèctes, particularaments ena fotografia de libellules. Gràcies ad aguest trebalh s’arribèren a descorbir quate naues espècies d’aguesti animaus ena Val d’Aran.

Estany a collaborat en diuèrsi estudis e publicacions, e en abriu de 2016 se podèc gaudir en Vielha d’ua exposicion sua que compdaue damb ua mòstra de 33 espècies de libellules que trapam en nòste territòri e ara qu’assistiren expèrts ena matèria de tot er estat.

Enguan se plaçarà ena Bassa d’Oles un pannèu informatiu de sensibilizacion cap ara natura, es insèctes e es libellules damb fotografies de Toni Estany, segontes a informat aué eth Sindic d’Aran.