Es apassionadi deth ciclisme de montanha an ua naua cita en sòn calendari. Deth 22 ath 24 de junh arribe ara Val d'Aran era Hard Bike, ua pròva de BTT per etapes que transcorrerà per disparièrs paisatges de montanha e bòsqui aranesi en un recorregut inedit enes competicions de BTT dejà existents en territòri.

Tres jornades dures que, jos eth lèma GO HARD OR GO HOME, haràn patir e gaudir a parts iguals as corredors. Calerà sarrar es dents damb desnivèus de nautada, mès tanben admirar es camins amagadi.

Adrià Puig, organizador dera corsa, explique que “des dera organizacion de Hard Bike mos demanam qué hèr entà aufrir ath corredor ua pròva dura, que perdure en temps e qu'ath madeish temps, repercutisque ena economia deth territòri dera forma mès evidenta”.

Era pròva se disputarà enes categories masculines absolut, master 30, master 40, veterans e femenina absoluta.

Ath delà, Hard Bike vò aportar eth sòn petit gran de sable ara societat. A compdar dera sua prumèra edicion realize un trabalh sociau en tot dar eth sòn supòrt a entitats damb fins solidaris. Aguest prumèr an, pr’amor qu'eth color corporatiu escuelhut ei eth vermelh, s'a optat per collaborar damb era Fundación Lucha contra el Sida.

Eth recorregut

Era prumèra etapa, eth dissabte 22 de junh, anarà de Salardú enquia Bossòst en un traçat de 75 quilomètres damb 3.100 mètres de desnivèu positiu e diuèrsi avitualhaments en Vielha (16km), Santet de Casau (30km) e Es Bòrdes (52km).

Eth dimenge 23 de junh debanarà era dusau etapade Bossòst enquia Salardú. Seràn 55 quilomètres damb 2.600 mètres de desnivèu positiu que començaràn fòrti damb era pujada enquia Arres, a on demorarà eth prumèr avitualhament (14km). Es auti seràn en Mont (31km) e Vielha (45km).

Fin finau, eth deluns 24 de junh se disputarà era tresau e darrèra etapa damb gessuda e arribada en Salardú. Aguest ei un recorregut de 50 quilomètres damb un desnivèu acumulat de 2.000 mètres e tres pujades destacades a Pruedo, Montromies e Banhs de Tredòs. Es avitualhaments seràn en Arties (19km) e Aiguamòg (28km).

Inscripcions

Es interessadi en participar ena pròva an de saber que dispòsen de diferentes opcions: eth paquet Hardbike Total entà realizar es tres etapes o eth Hardbike Weekend entath 22 e 23 de junh. Es inscripcions son dubèrtes enquia aumplir places.

Lotjament

Es corredors dera Hard Bike pòden gaudir de prètzi especiaus en sies lotjaments dera Val d'Aran aderidi ara pròva. Toti apròp des scenaris en qu’aurà lòc era cita coma Salardú, Arties, Garòs e Bossòst.

Mallòt

Hard Bike vò escapar deth concèpte de bikemarathon, en tot considerar-la ua carrèra de singletrack marathon, a miei camin entre eth marathon e er allmountain. Per aguest motiu er estil dera pròva agarre detalhs de dues disciplines bikers.

Eth mallòt seguís un dessenh inspirat ena figura deth lenhador. Sense dobte, ua pèça de ròba que caracterizarà a toti es hardbikers e harà qu'es corredors se fixen en era.

Aguesta pròva ei organizada per Pyrenees Attitude e compde damb eth supòrt deth Conselh Generau d’Aran, er Ajuntament de Naut Aran, er Ajuntament de Bossòst e Torisme Val d’Aran.