Pendent aguesta setmana, er Ajuntament de Vielha e Mijaran a finalizat es òbres de substitucion deth tet dera Sala Polivalenta de Vielha. Aguest trabalh a consistit en apariament deth tet e des elements que lo formen, pr'amor que se trapauen en un estat fòrça deficient. D'aguesta manèra, s'esvitarà que i age mès filtracions d'aigua que provocauen un empejorament deth solèr dera installacion e era possibilitat de qu'es usatgèrs poguessen hèr-se mau pendent eth sòn emplec.

Un viatge finalizada era melhora deth tet, es òbres ena Sala Polivalenta contunhen damb er apariament e reforma dera entrada der equipament, tanben damb era substitucion der enlumenat interior, en tot aquerir un enlumenat damb sistèma LED que serà fòrça mès sostenible e economic entath municipi, e ua melhora dera façana exteriora, pr'amor que presente un estat fòrça deficient pera manca de mantenement pendent es darrèri 30 ans.

Aguestes òbres seràn prèstes aguesta primauera, en tot èster era prumèra fasa de melhora, en tot alongar-se en sòn conjunt en diuèrsi exercicis. Un viatge finalizada era totalitat dera reforma, aguest espaci poderà emplegar-se coma auditòri, en tot perméter era acuelhuda de convencions, e per tant, plaçar-se coma un punt clau entà atrèir ua nauta preséncia de torisme de negòcis en futur. En tot cas, aguesta foncion complementarà as emplecs actuaus coma sala entara practica esportiva, culturau, e coma Sala de Hèstes ena Hèsta Major de Vielha en seteme.

HÒNT: AJUNTAMENT DE VIELHA E MIJARAN