Annaument, des de Musèus dera Val d’Aran se prepause ua tematica especiau, entorn ara quau viren moltes des activitats, exposicions e actes que realizen ath long des mesi, ua forma de commemorar o méter en valor çò que tracten, precisament, es tèmes escuelhudi. 

Pendent er an 2017 era gastronomia a estat era grana protagonista en hilat de Musèus dera Val d’Aran, qu'a realizat un totau de nau innovadors projèctes restacadi damb eth minjar, damb er objectiu de fusionar gastronomia e musèus entà apropar era cultura ara societat a trauès d’un tèma quotidian coma ei aguest.

Darrèr de tota accion, enes musèus i a tostemps era intencion de qu’es visitants aprenguen a trauès dera experimentacion en prumèra persona e d’elements que les resulten familiars. 

Aguest An dera Gastronomia a acuelhut actes coma es exposicions: "Exposicion Collectiva d’Artistes d’Aran" e "Paisatges ena Taula"; es talhèrs familiars: Nhacs Artistics e Pinchos Artistics, o eth dejà assolidat Dia Internacionau dera Poesia, ua serada poeticomusicau damb eth minjar coma protagonista des poèmes.

Coma nauetat, enguan s'an introdusit es eveniments teatralizats, amiadi a tèrme en Ecomusèu Çò de Joanchiquet e ena Glèisa de Sant Joan d’Arties. Ambdús projèctes an agut un gran èxit e an compdat damb un gran nombre d’assistents, e public majoritàriament locau. 

Era Glèisa de Sant Joan ei er scenari a on se desvolòpe “Era Taula deth governador”, eth sopar teatralizat que simule un banquet deth sègle XVII. Aguesta setmana gesseràn ara venta es entrades per auança dera darrèra foncion, qu'aurà lòc eth 29 de deseme. 

Entàs mès petiti, eth governador tanben les convidarà a vrespalhar en St Joan d’Arties eth dia 4 de gèr. En aguest cas, serà ua activitat gratuïta mès damb aforament limitat.

Era màger part d’aguestes activitats an estat finançades per Institut d’Estudis Ilerdencs (Deputacion de Lhèida), gràcies ara subvencion concedida a Musèus dera Val d’Aran, destinada as activitats de 2017.

IMATGE: CONSELH GENERAU D'ARAN