Eth Hilat de Musèu dera Val d'Aran encete era sason d'iuèrn damb fòrça actiuetats

01/12/2017

"Era taula deth Governador", ei era grana atraccion pendent eth Pònt dera Puríssima

Eth Hilat deth Musèu dera Val d’Aran encete ua naua sason d’iuèrn enes desparières installacions que lo conformen. A compdar deth 4 de deseme, e enquiath pròplèu 1 d’abriu, es diuèrsi musèus deth país estreen en nau orari d’iuèrn entàs visitaires, que se poderàn campar enes triptics que son distribusidi pes musèus, burèus de torisme, eth Conselh Generau d’Aran e era Bibliotèca Generau de Vielha.

Pendent eth pònt dera Puríssima ena glèisa Sant Joan d’Arties s’inaugure ua actiuetat innovadora qu’ei un sopar teatralizat qu’amie per nòm “Era Taula deth Governador”, en tot completar es actiuetats restacades damb er An dera Gastronomia.

Pendent era rèsta der iuèrn eth Hilat deth Musèu dera Val d’Aran tanben aufrís d’autes actiuetats que son dirigides ara mainadèra, e qu’auràn lòc pendent es hèstes de Nadau, entà qu’es mès petiti poguen apréner ath madeish temps que gaudissen d’aguestes actiuetats.

Aguestes actiuetats se compaginen en Arties damb era exposicion “Paisatges ena Taula” que se pòt visitar enquiath 27 de gèr. Aguestes e d’autes iniciatiues culturaus contunharàn ath long der an enes musèus deth país laguens dera campanha qu’amie per lèma “Musèus d’Aran, tot er an”, entà promòir eth patrimòni culturau aranés pendent totes es sasons.

Manu Moga