Esbauçament de tèrres e abondius sauts d'aigua en Baish Aran

21/02/2018

Ena Bordeta un conductor a estat atengut per un atac d'ansietat, e en Portilhon comence a auer un excès d'aigua ena montanha

Era grana quantitat d’aigua e nhèu qu’a queigut ena Val d’Aran pendent es darrèri dies comence a causar damatges en diuèrsi endrets deth territòri. Ena Bordeta, s’a produsit un esbauçament de tèrres ath cant dera N-230 a prumèra ora deth maitin e qu’a talhat eth trànsit pendent 4 ores. Es Pompièrs an trebalhat entà trèir tèrra e pèires, en tot auer-i un accident, a on un conductor a estat atengut per un atac d’ansietat. Ath delà, aguest esbauçament a provocat importants damatges en hilat telefonic e d’Internet de bona part des municipis deth Baish Aran.

D’aute biais, en Pòrt deth Portilhon, es sauts d’aigua comencen a èster fòrça abondius pendent es 4 prumèri quilomètres. En tot aguest parçan, se pòden veir granes quantitats d’aigua que gessen dera montanha, e que crotzen pera carretèra deth pòrt.

Per toti aguesti ahèrs, ei de besonh extremar era precaucion autant se se viatge damb veïculs coma a pè, pr’amor qu’en quinsevolh moment se pòt produsir un nau esbauçament.

Manu Moga