Es alumnes dera Escòla Garona, grani cineastes deth concors “Vielha e Mijaran: Montanha e Cinèma”

09/03/2019

Aguesta tarde a compdar des 19:00 ores, ena sala Era Audiovisuau, se procedirà ath liurat de prèmis laguens des actes previsti enes Jornades Europèes de Cinèma de Montanha

Era tarde de dijaus, 7 de març, s'amièc a tèrme eth liurament des diplòmes as alumnes d'educacion primària dera Escòla Garona que participèren en 2au Concors de Cuertmetratges “Vielha e Mijaran: Montanha e Cinèma”, a on se presentèren un totau de 19 projèctes.

Era còsso d'Ensenhament e Cultura de Vielha e Mijaran, Maria Vergés, amassa damb era aupinista e directora dera Agéncia Kabi Travels, Edurne Pasaban, sigueren es encargades de liurar aguestes distincions as participaires.

Precisament, Pasaban, mairia des II Jornades Europèes de Cinèma de Montanha qu'an lòc entre aué e deman, a entestat eth jurat qu'a decidit autrejar un prèmi a toti es alumnes dempús dera nauta participacion que i a agut. Un prèmi que consistís en un vrespalh entà toti es alumnes, entrades de teatre e materiau escolar.

Es cuertmetratges presentadi viren ath torn dera montanha e dera natura dera Val d’Aran: respècte ath miei ambient, bones practiques, activitats ena montanha… Era categoria escolara ei era grana nauetat d'aguest concors d'enguan.

Vergés arregraïc era nauta participacion en aguest concors que, segontes expliquèc, ”vò dar a conéisher eth potenciau naturau, socioculturau e esportiu deth municipi de Vielha e Mijaran en concrèt e dera Val d’Aran en generau, atau coma prebotjar eth respècte ath miei naturau, eth coneishement des montanhes araneses e es bones practiques enes espòrts que se desvolòpen ena natura”.

Aguesta tarde a compdar des 19:00 ores, ena sala Era Audiovisuau, se procedirà ath liurat de prèmis laguens des actes previsti enes Jornades Europèes de Cinèma de Montanha.

IMATGE: AJUNTAMENT DE VIELHA E MIJARAN
Clara Villar