Era Val d’Aran a començat era tramitacion entà demanar que sigue declarada coma Auviatge dera Umanitat pera UNESCO. Un reconeishement peth quau se comence a trebalhar damb er inici deth bastiment d’un expedient a on s’i poguen establir toti es criteris que favorisquen aguest nomentament. Laguens des categories qu’establís era UNESCO, era Val d’Aran serie reconeishuda coma Auviatge dera Umanitat Mixte, en tot includir autant aspèctes culturaus coma naturaus. Un prètzhètz que tot just se trape enes sòns inicis, ena qu’es bailes deth territòri an podut conéisher eth projècte de mans der assessor en ahèrs de cultura deth Conselh Generau d’Aran, Jèp de Montoya.

Eth projècte includís aspèctes culturaus coma era hèsta des Barbacans. Ua hèsta ancestrau ena que se rend tribut ara figura der os, tradicionauments venerada en aguesta zòna d’Euròpa, atau coma es hèstes deth huec, qu’a compdar de deseme de 2015 son reconeishudes coma Auviatge Immateriau pera UNESCO. Era identitat aranesa, en tot tier en compde sustot era lengua, tanben ei un aute des ahèrs que son contempladi en futur expedient. Mès ei un projècte que non serà finalizat a cuert termini, senon que calerà demorar un minim de 4 o 5 ans.

Un viatge prèst er expedient, aurà de presentar-se deuant der Estat Espanhòu, qui aurà d’acceptar-lo, e fin finau defener-lo deuant dera UNESCO, pr’amor qu’aguest tipe de reconeishements son a nivèu estatau. Dempús dera distincion Biosphere e Auviatge Immateriau des hèstes deth huec, eth conjunt dera Val d’Aran serie eth pas definitiu de reconeishement que li mancarie arténher ath país.