Era Comission d'Urbanisme da lum verda ath bastiment d'ua bassa en Beret

11/06/2019


Era darrèra Comission d'Urbanisme d'Aran a dat eth vist e platz ath bastiment d'ua bassa d'emmagazinatge d'aigua en Plan de Beret.

Ac a hèt dempús d'auer arrecebut toti es informes favorables. Totun, aguest plan urbanistic especiau non se poderà aprovar definitiuaments enquia qu'eth plen er Ajuntament de Naut Aran ac autorize.

Aguesta installacion aurie er objectiu d'assegurar era produccion de nhèu enes mesi a on es nheuades son mès escasses.

D'auta banda, era Comission d'Urbanisme a mantengut era suspension deth plan parciau urbanistic de Bagergue. Un plan que prevé lèu ua trentia d’abitatges entar usatge autant residenciau coma otelèr. Eth motiu ei que non s’a justificat qu'eth terren que se vò urbanitzar se tròbe per jos d’un arribent deth 20%.

Arrebrembam qu'eth Plan Director Urbanistic d'Aran tipifica qu'es solèrs damb mès d'un 20% d'arribent an de demorar liures d'edificacion.

En çò que tanh a Baqueira/Beret, aguesta Comission d’Urbanisme a aprovat era substitucion deth telecagira dera Mina, ena zòna d’Argulls, e era ampliacion d’un edifici destinat a talhèr plaçat ena còta 1800.

Tanben se reformarà un bar restaurant plaçat ena còta 2.200 de Baqueira, en tot bastir ua naua terrassa.
Laura Rodríguez