Er Espitau Val d’Aran aurà un nau aparelh de TAC e ua incobadora

22/06/2020

Eth Conselh Generau d’Aran receberà un ajut de 326.700 euròs dera Deputacion de Lhèida entath renauiment d’equipaments medics en Espitau Val d’Aran. Concrètament, aguest impòrt anarà destinat ar aquesiment d’ua equipa TAC e ua incobadora de transpòrt.

“Un nombre elevat de mashines deth nòste espitau se trapen en situacion d’obsolescéncia tecnologica pr’amor dera manca d’inversion pendent es darrèri ans e eth govèrn aranés sollicitèc eth supòrt dera Deputacion de Lhèida entath sòn renauiment”, afirmaue eth sindic d’Aran, Francés Boya, en tot híger que: “ère de besonh actualizar çò de mès lèu possible es equipaments der Espitau Val d’Aran entà poder melhorar era assisténcia sanitària des vesins e vesies dera Val d’Aran e dera Ribagorça, atau coma de toti es vistants que recebem ath long der an”.

Er Espitau Val d’Aran dispòse d’un aparelh TAC damb data d’installacion de 2007 que dejà non pòt realizar es pròves damb qualitat sufisienta entà desvolopar es prètzhèts assistenciaus que realize eth centre medic. Atau madeish, des der espitau s’a acordat tanben cambiar de forma urgenta era incobadora de transòrt.

“Aguest ajut ei frut d’un acòrd mès ampli que mos a de perméter reforçar era collaboracion entre eth Conselh Generau d’Aran e es ajuntaments aranesi damb era Deputacion de Lhèida”, manifèste eth deputat provinciau per UA e conselhèr d’Aran, Amador Marqués.

En aguest sens, cau rebrembar que pendent aguest mes de junh s’a artenhut barrar er acòrd entara renovacion, reforçament e ampliacion deth convèni marc entre eth Conselh Generau d’Aran e era Deputacion de Lhèida.

HÒNT: CONSELH GENERAU D'ARAN
Laura Rodríguez