Lo que o çò que? Aquieu o aquiu? Eth cors de correccion lingüistica en aranés impartit pera Acadèmia aranesa dera lengua occitana a balhat diuèrsi arnesi e tecniques entà determinar es critèris de correccion der aranés. Ues ores ben aprofitades entà navegar ena istòria occitana, mès tanben enes emplecs actuaus dera lengua.

Un des punts fòrti d’aguest cors a estat era arrica referència documentau que s’a balhat as alumnes entà dar explicacions fonamentades sus era correccion lingüistica. Des de referéncies de prestigiosi trobadors enquia grani erudits coma Mossèn Condò, Alibèrt o Coromines. Ua cronologia qu’ajude a bastir ues pautes que seràn emplegades enes decisions de correccion dera lengua.

Des d’era Acadèmia Aranesa dera Lengua Occitana arrebremben qu’eth sòn trabalh ei merament orientatiu, qu’eth poder reau requé en pòble. E, per aquerò, era sua labor a d’èster en constant moviment, entà adaptar-se ad aqueth organisme viu, nomenat lengua.