Aué tàs 22 ores, estrea deth Debat deth Conselh Generau d'Aran en Lleida Televisió

13/05/2019

Aué, deluns 13 de mai tàs 22 ores , estrea deth debat electorau deth Conselh Generau d’Aran.

Carlos Barrera, candidat per CDA e Paco Boya, candidat per Unitat d’Aran, mos aproparàn eth sòn programa electorau en tot debater en un cara a cara sus diuèrsi ahèr restacadi damb eth Conselh Generau d’Aran. Un debat moderat pera periodista aranesa Clara Villar.

Aguest debat electorau s’estructurarà en diuèrsi blocs tematics. Es candidats an, d’aguesta forma, ua menuta entà exposar era sua vision en relacion damb es ahèrs prepausadi. Dempús, se daurirà un torn de réplica e alegacions en qu’ambdus candidats auràn era oportunitat de defener eth sòn punt de vista e rebater ath contrari.

Economia, desplegament dera lei d’Aran, trabalh ,es rèptes d’Aran e era problematica der accés ara viuenda son bèri des temes mès destacadi des que se parlarà en debat.

Ath finau d’aguest cara a cara electorau, Barrera e Boya demanaran ena menuta d’aur eth vòt des ciutadans en tot balhar es arrasons pes quaus considèren qu’e son era milhor opcion tà governar era Val d’Aran.

Arrebrembam qu’aguest debat s’estree aué, deluns 13 de mai tàs 22 ores dera net, e se tornarà a emeter deman, dimars 14 de mai, tàs 12 deth meddia.

Laura Rodríguez