Aué diuendres, dia 9 de març, comencen es prumères Jornades Europèes de Cinèma de Montanha en cap-lòc aranés.

Un eveniment enmarcat laguens des activitats desvolopades en marc deth projècte de cooperacion transfronterèra Interreg-Poctefa “Reiaume der Aneto”, e qu’er Ajuntament organize amassa damb eth Mendi Tour Bilbao Mendi Festival e damb era aupinista Edurne Pasaban. 

Pendent es dus dies se poderàn vier un totau de cinc films, toti eri premiadi ena edicion de 2017 deth Bilbao Mendi Film Festival. Atau madeish, pendent es Jornades, se daràn a conéisher es premiadi en Prumèr Concors de Cuermetratges a trauès de telefon mobil “Vielha e Mijaran: montanha e cinèma”.

Aguesta tarde, tàs 19:00 ores, se projectaràn ena sala Era Audiovisuau de Vielha es films Where the Wild Things Play e Dirtbag: The Legend of Fred Beckey (Prèmi deth Public en BMFF).

Es entrades se pòden recuélher en Ajuntament de Vielha e Mijaran de forma gratuïta, damb un maxim de cinc entrades per persona, o ben ena agéncia Kabi Travels (avgda. Pas d’Arró, 40 de Vielha)