Acòrd entara Gestion Integrau d'Emergéncies en Aran

13/05/2019

Dempús de tres ans de longues negociacions eth darrèr dia 6 de mai ena amassada dera Comission Bilaterau Govèrn dera Generalitat-Conselh Generau d’Aran s'artenhec er acòrd d'ampliament deth finançament entà hèr realitat eth nau modèl de gestion d'Emergéncies en Aran.

Era estructura ja creada en aguesti darrèri mesi, nomentada Pompièrs Emergéncies, includís es servicis de Transpòrt Sanitari, Prevencion e Escandiment de huecs, Rescats en Montanha e Proteccion Civila, donques, un modèl singular de gestion integrau des emergéncies en Espanha.

Ua des principaus dificultats a estat eth finançament d'aguesta estructura en çò que hè ara cartèra dera Prevencion e Escandiment de Huecs e Sauvaments.

Es parts negociadores acordèren adoptar un critèri de recorsi economics parièrs as que s'aplique en d'auti lòcs damb territòri e estructures similars as dera Val d’Aran. Un parc principau (Vielha) assimilat a un parc de pompièrs foncionaris, e dus parcs (Les e Bossòst) assimiladi de pompièrs volontaris.

S'acòrde tanben, er establiment d'un periòde transitòri en qu'eth Conselh Generau d’Aran crearà de forma periodica (4 ans) era sua estructura, de recorsi umans, coma de renauiment e aquesiment de veïculs e equipaments. Dempus d’aguest periòde eth Conselh Generau desvoloparà pleaments es sues competéncies que li autrege era Lei d’Aran en aguesta matèria.

Aguest acòrd contemple que pendent eth periòde 2019-2022 es substitucions de veïculs destinadi ara cartèra de Pompièrs, contunharàn d'èster finançades pera Direccion Generau de Prevencion e Escandiment de Huecs e Sauvaments dera Generalitat, en tot aplicar es madeishi critèris tecnics qu'aguesta adòpte entath rèste de territòris de Catalonha.

Laguens eth periòde transitòri se preve era adaptacion e incorporacion de personau. Actuauments se definís eth sistèma d'incorporacion deth pompièr damb veïcul laborau. Evidentaments, eth sistèma meterà en valor es aspèctes qu'an fondamentat era existéncia deth collectiu de Pompièrs d’Aran.

Era prevision ei qu'a 31 de deseme de 2022 eth finançament negociat, que per aguest motiu se harà des dera Generalitat de Catalonha en matèria de Prevencion e Escandiment de Huecs e sauvaments entara estructura de Pompièrs Emergéncies sigue de 3.529.248,59 € per an.

Es parts an acordat qu'en periòde transitòri, eth comandament correspone a un foncionari damb era categoria d'inspector deth còs de pompièrs dera Generalitat de Catalonha, e qu'eth Conselh arreconeisherà damb era denominacion de Major. Eth rèste deth personau aurà vinculacion laborau.

Un còp superat eth periòde transitòri e incorporat eth personau depenent deth Conselh Generau d’Aran, era figura de Major requeirà en un foncionari deth Conselh Generau adscrit a Pompièrs Emergéncies.

En çò que tanh ath Transpòrt Sanitari se manten eth madeish ritme de substitucion e incorporacion de naues ambulàncies cossent damb es requeréncies legaus dera sua vida utila (10 ans). Cau arrebrembar qu'eth Transpòrt Sanitari hè part d'un traspàs de competéncies especifiques, non includit en acòrd ath que se hè referéncia.

En pròplèu Plen deth Conselh Generau d’Aran actualizarà era relacion de lòcs de trabalh entà formalizar era figura de Major qu'en aguest periòde transitòri desvoloparà un inspector deth Còs de Pompièrs dera Generalitat, que coneish era singularitat deth dispositiu de responsa as emergéncies en Aran.

Fin finau, arrebrembar qu'en aguest sens eth pròplèu 22 de mai, eth conselhèr d'Interior dera Generalitat de Catalonha, Sr. Miquel Buch, visitarà es installacions de Pompièrs Emergéncies e signaràn, amassa damb eth sindic d’Aran, Carlos Barrera, er acòrd formalizat ena amassada dera Comission Bilaterau Generalitat-Conselh Generau d’Aran deth passat 6 de mai.

HÒNT: CONSELH GENERAU D'ARAN

Laura Rodríguez