28au edicion dera Hèsta de Sant Pònç en Vielha

06/05/2019

Un an mès, Vielha e Mijaran tornarà a celebrar era hèsta en aunor de Sant Pònç. Eth pròplèu dissabte, 11 de mai, arribe era 28 edicion d’aguest tradicionau concors de pastissi, licors e confetures.

Tàs 17:00 ores aurà lòc era presentacion des productes, que seràn avaloradi per part d’un jurat format per professionaus deth sector. I aurà tanben ua demostracion de codina a cargue dera Escòla d’Ostalaria de Les tàs 17:30 ores.

Un shinhau mès tard aurà lòc eth repartiment de prèmis, 75 euròs tà cada categoria: pastís mès bon, pastís mès originau, milhor pastís salat, milhor pastís sense gluten, milhor pastís d’elaboracion infantil tàs menors de 13 ans, milhors crespèths, milhors coquilhons, milhor licor e milhor confetura.

Dempús de tot açò, arribarà eth moment mès doç dera jornada, damb ua degustacion de toti aguesti productes, que de ben segur agradaràn as mès gormands.

Clara Villar