Hèsta dera Lan en Vielha aguest deseme

24/11/2017

Pendent es dies 7 e 9 de deseme arribe a Vielha era dusau Hèsta dera Lan, organizada per Ajuntament de Vielha e Mijaran e eth Talhèr Texil de Bausen.

Aguesta hèsta amasse artesans que trebalhen era lan de diferentes manères, e a coma objectiu compartir experiéncies entre es madeishi professionaus e mostrar ath public es sues produccions e creacions elaborades en tot er estat espanhòu (Cantàbria, Aragon, Madrid, Catalonha, Val d'Aran) e França.

Des der an 2012, era fondadora deth Talhèr Texil de Bausen, Carmen Bonifaci (professionau deth mon dera lan des d'hè mès de 40 ans), amassa damb era associacion ACORA e eth supòrt deth Conselh a reorganizat eth sector dera lan des oelhes de raça aranesa, ua espècia qu'ei en perilh d'extincion e dera quau sonque queden uns 2.000 exemplars entre era Val d'Aran e eth Pallars Sobirà.

Er objectiu de Bonifaci ei doble: dar supòrt ara artesania e ara industria dera lan, e revalorar era lan dera oelha aranesa entà conservar era diversitat ovina enes Pirenèus. De hèt, en aguesta Hèsta dera Lan se preste ua especiau atencion as iniciatiues qu'an coma objectiu revalorar es espècies autoctònes deth Pirenèu: era aranesa e era ansotana, d'Aragon.

Damb aguesta acte, es organizadors pretenen situar Vielha e era Val d'Aran en mapa professionau deth sector dera lan a escala pirenenca e iberica.
Clara Villar