Salardú acuelh era dusaua cita deth cicle d'hèires deth bestiar dera Val d'Aran

08/10/2018

Eth pòble de Salardú siguec er encargat d’acuélher era dusaua cita deth cicle d’hèires deth bestiar dera Val d’Aran. Es prumères nhèus dera sason enes còtes mès nautes des montanhes dèren era benvenguda a toti es participaires e assistents ad aguesta tradicionau hèira ena qu’es ramadèrs son es grani protagonistes.

Aguesta hèira ei tanben un aumenatge ara ramaderia, en tot arrebrembar es tradicions e es practiques que tostemp an entornejat ad aguest mestièr e que semble que pòc a pòc se van perdent damb eth pas deth temps.

Es diuèrsi Ajuntaments qu’organizen aguestes hèires balhen ua sòrta d’incentius ar ramadèrs entà estimular era celebracion d’aguest tipe d’eveniments. en aguestes jornades es ramadèrs mòstren eth sòn bestiar. Molt soent tanben aprofiten aguestes escadençes entà méter ara venta quauqui des sòns exemplars.

Era Hèira deth bestiar de Salardú ei tanben un punt d’amassada anuau entà toti es ramadèrs dera zòna. E enguan, eth trending topic, ei a díder, eth tèma centrau de convèrsa, non podie èster aute qu’es creishenti atacs der os en parçan. Un hèt que preocupe a toti.

Eth cicle des hèires deth Bestiar dera Val d’Aran contunhe damb era Hèira de Vielha e concludirà eth dissabte 3 de noveme damb era Hèira de Bossòst que se celebrarà amassa damb era Mongetada.

Laura Rodríguez