Er Ajuntament de Les amiarà a tèrme era remodelacion d’un des punts mès emblematics dera localitat: era plaça der Ajuntament. Aguesta accion se dividirà en dues fases, e era prevision ei qu’era prumèra comence dempús des hèstes de Nadau, ei a díder, lèu.

Eth pressupòst d’aguestes òbres serà d’uns 75.000 èuros.  

Ua accion que balharà foncionalitat e seguretat ar espaci.

Tanplan, ara demora d’ua naua financiacion, s’abordarà er inici dera dusaua fasa.

Tot e qu’era climatologia condicionarà eth periòde de finalizacion d’aguestes òbres, se prevé que s’acaben abantes dera primauera.

Un aute des ahèrs ei restacat damb era N-230 en sòn pas per Les. Hè dus ans qu’eth consistòri dera localitat hèc ua sollicitud ath Ministèri de Foment entà redusir era velocitat generica deth trafic pesat ena travesia. Era responsa, afirmatiua, mès calie determinar eth tram de reduccion de velocitat.

Ath delà, un aute des ahèrs pendents ei eth des trabalhs d’acondicionament deth pònt vielh de Les, a cargue dera Deputacion.