Era Setmana Santa de Bossòst, suspenuda per prumèr viatge d'ençà era Guèrra Civiu

02/04/2020

Aguestes imatges que cada an se repetissen en pòble de Bossòst damb era arribada dera Setmana Santa… auràn de demorar un an més entà tornar a poder èster gaudides. 

Er estat d’alarma en que se trape er Estat Espanhòu a causa dera pandèmia deth coronavirus a obligat a Bossòst a suspéner toti es actes dera sua Setmana Santa, que anauen a començar era pròplèu dimenjada. 

Quauquarren excepcionau, pr’amor qu’era Setmana Santa de Bossòst non s’anullaue d’ençà era Guèrra Civiu.

Cau arrebrembar que Bossòst ei er unic pòble aranés que celèbre es processons de Setmana Santa. 

En aguesta linha, mès de 200 vesins e vesies de Bossòst participen en aguesti passi tan singulars. Pr’amor qu’era Setmana Santa de Bossòst, ei dejà un simbèu d’unitat e frairesa en aguest municipi deth baish Aran.

Ua celebracion autant religiosa coma culturau qu’amasse a centenats de fidèus, qu’enguan, malerosament, auràn de demorar en casa damb era esperança de retrobar-se er an que ven. 

Laura Rodríguez