Era fibra optica arribarà en Bossòst pendent aguesta tardor

19/08/2020

Era fibra optica ei dejà mès a pròp d’arribar en Bossòst. Quauquarren que se pòt afirmar  dempús de qu’er Ajuntament deth municipi e era companhia Orange agen arribat a un acòrd d'extension dera fibra optica ena localitat. 

Era prevision ei que pendent aguesta tardor Bossòst dejà pogue gaudir dera fibra optica , en tot auançar era cobertura en pòble, qu'ère planificada entath 2023. 

Ua bona notícia entara localitat, e sustot entad aqueri qu’en aguesti tempsi de pandèmia an agut de cambiar es abituds de trabalh, en tot auer-se d’adaptar ath teletrabalh. 

Entad açò, er operador privat de telecomunicacions invertirà 140.000 èuros ena zòna entà un mercat de 860 unitats domiciliàries. Ua inversion qu’ei possibla gràcies as subvencions provenentes deth Govèrn d'Espanha e de hons dera Union Europèa. 

Laura Rodríguez