Era exposicion fotografica "Era Pagesia en Aran" se poderà visitar enquiath dimenge 4 de noveme

03/11/2018

En tot coincidir damb era celebracion dera Mongetada e era hèira deth Bestiar, Bossòst a inaugurat ua exposicion fotografica sus era Pagesia ena Val d’Aran. Es imatges, que daten des de principis deth sègle XX enquiar an 2000, mòstren es cambis qu’a anat patint eth sector pendent eth temps.

Era Val d’Aran a vist com eth sector primari a anat perdent fòrça damb eth transcors des ans, ath temps qu’eth sector de servicis li anaue guanhant era partida. Eth modèu economic aranés a passat per ua grana metamorfosis, e era pagesia se i a vist plan afectada.

En aguest sens, es conseqüéncies dera pèrta de poder dera pagesia ja an començat a hèr acte de preséncia ena Val.

Aguesta exposicion, que compde damb era interpretacion des fotografies per part d’un guida, se base en un libre publicat peth Musèu Etnologic dera Val d’Aran en 2005. A on, entre fòrça autes fotografies, se i pòt trapar aguesta deth 1928.

Aguesta mòstra se poderà visitar ena Sala d’Exposicions de Bossòst, plaçada ena madeisha oficina de Torisme, enquiath dimenge 4 de noveme, en orari d’11 deth maitin enquias 13 ores e des 17 as 19 dera tarde.     

Laura Rodríguez