Juan Antonio Serrano tornèc a èster proclamat alcalde de Vielha e Mijaran damb 8 vòts favorables. Ua des còssos d’Unitat d’Aran non podec assistir ar acte de constitucion der Ajuntament deth passat dissabte, 15 de junh, e per tant en sòn vòt non se podec somar ara investidura de Serrano.

Pera sua part, es tres còssos de Convergéncia Democratica Aranesa votèren ath candidat Pau Perdices, mentre que Aran Amassa non presentèc pas candidatura e eth sòn unic còsso votèc en blanc.

Aguesta ei era dusau legislatura consecutiua d’Unitat d’Aran ath front der Ajuntament de Vielha e Mijaran, legislatura qu’afronten, diden, damb es madeishes ganes e illusion que hè quate ans.

Dejà en campanha era equipa de govèrn mostrèc era grana quantitat de projèctes qu'an en ment e que vòlen desvolopar pendent es pròplèus ans.

A diferéncia dera passada legislatura, ena actuau eth consistòri compdarà damb eth supòrt d’un Conselh Generau d’Aran governat tanben peth madeish grop politic, çò qu’aurie de supausar majors facilitats entà ambdues institucions.

Pendent eth maitin deth 15 de junh preneren tanben possession deth cargue es bailes des pedanies deth municipi.