Un des ahèrs que se manifestèc en darrèr plen deth Conselh Generau siguec era preocupacion existenta entre es vesins deth Baish Aran sus eth cambi de modèu ena atencion primària d’aquera zòna. Un cambi que se demore que s’implante enes pròplèus setmanes e qu’afectarie as oraris actuaus de consulta medica.

Ei a díder, se rebaisharien es ores de consulta enes dispensaris deth Baish Aran en tot compensar-les damb ua atencion domiciliària qu’abastarie tota era Val d’Aran.

Entà balhar toti es detalhs d’aguest cambi d’atencion primària, des deth Conselh Generau d’Aran s’an comprometut a realizar amassades informatiues.

En aguestes amassades, que s’amiaràn a tèrme en toti es consistòris interessadi, tanben s’escotaràn es opinions de toti aqueri vesins sus aguest ahèr tan important.