Nèish eth Club de Lectura de Documents Antics dera Val d’Aran

29/11/2018

Eth Club de Lectura de Documents Antics dera Val d’Aran ei dejà ua realitat dempús der exit qu’auec eth talhèr de lectura de documents antics amiat a tèrme en junh.

D’aguesta forma, es components d’aguest caracteristic Club s'amassen un dissabte ath mes en Archiu Generau d’Aran entà liéger e trabalhar bèri documents depausadi.

Tot comencèc gràcies a ua activitat que s’organizèc pendent eth passat mes de junh damb motiu deth Dia Internacionau des Archius. Atau, en Archiu Generau d’Aran s’amièc a tèrme un talhèr de lectura de documents antics dera Val d’Aran. Era activitat auie coma objectiu aufrir es prumères pautes entara lectura de documents produsidi en Aran entre es sègles XIV e XIX.

Era metodologia deth talhèr combinèc era explicacion d’uns concèptes basics damb era realizacion d’uns exemples practics, que promoigueren era participacion des assistents.

Un còp finalizada era activitat, es participaires prepausèren contunhar damb era experiéncia. Dempús de quate sessions, s’a creat eth Club de Lectura de Documents Antics dera Val d’Aran.

E d’aguesta forma, un dissabte ath mes, entre 10 e 12 persones, se trapen en Archiu, coordinadi pera directora Maria Pau Gómez, entà liéger e comentar dus o tres documents.

En aguesti moments, es documents que se trabalhen hèn part deth hons patrimoniau Çò de Sebastian e Marionha de Vilac. Era lectura se centre en conéisher era vida deth doctor en medecina Fèlix Demiguel Estreme, que viuec entre eth 1697 e eth 1778.

Eth doctor se maridèc tres còps e a trauès des capítols matrimoniaus, des documents dotals, des dera administracion deth sòn auviatge e deth sòn testament, se coneishen notícies de coma siguec era sua vida en sègle XVIII.

Un còp trabalhat es documents, es membres deth Club de Lectura de Documents Antics vòlen redigir un article e publicar-lo en pròplèu numèro dera revista Tèrra Aranesa dera Fondacion deth Musèu Etnologic dera Val d’Aran.

Laura Rodríguez