Pendent era jornada d'aguest dijaus 22 de junh s'a celebrat un nau plen extraordinari en municipi de Bausen. Pendent aguesta session, s'a aprovat damb vòts a favor deth govèrn municipau d'Unitat d'Aran era contractacion d'un peon entàs pròpleus 4 mesi. Aguest nau trebalhador iniciarà es sòns prètzhèts a compdar der 1 de junhsèga. Era prepausa a compdat damb era abstencion dera oposicion de Convergéncia Democratica Aranesa. "Ei ua grana noticia entath municipi aguesta contractacion, pr'amor que hè dejà uns 6 ans que non i auie cap peon en pòble", comente era bailessa de Bausen, Veronica Fontan.

Eth 2au punt dera orde deth dia a estat balhar informacion sus un decrèt en quau s'informaue deth pagament des compdes d'aigua ara Agéncia Catalana der Aigua (ACA) des exercicis 2007, 2010 e 2011 per un valor apruprètz de 6.000 €. 

Aguest a estat eth 2au plen que s'a celebrat en Bausen a compdar dera incorporacion dera naua secretària enes ahèrs d'aguest municipi de Quate Lòcs. De cara ath 7 de junhsèga ei previst celebrar un nau plen extraordinari, a on dejà se poguen debàter es compdes des exercicis 2014 e 2015. "Mos cau començar a tractar es compdes deth pòble, pr'amor qu'encara auem diuèrsi exercicis sense barrar. Pòc a pòc vam en tot auançar damb eth trebalh endarrerit", ahigís Fontan.

Dejà serà en mes de seteme quan eth govèrn municipau sajarà de poder convocar eth prumèr plen ordinari deth consistòri damb es darrèri compdes auançadi.


IMATGE: Vista de Bausen (www.visitvaldaran.com)