Eth Conselh Generau d’Aran implemente era remassada pòrta a pòrta de carton entàs negòcis de Les e Bossòst

27/02/2020

Eth govèrn deth Conselh Generau d’Aran implementarà a compdar d’aguesta setmana era recuelhuda de papèr e carton pòrta a pòrta entàs establiments e negòcis des pòbles de Bossòst e Les.

Eth conselhèr de Territòri, Paisatge e Gestion ambientau, Oriol Sala, a informat qu’aguest servici “s’amiarà a tèrme es diuendres pera tarde, a compdar des 15:00 ores, e es establiments que i participen auràn de deishar es caishes en carrèr, ath cant dera sua pòrta, degudament plegades e sense plastics ne quinsevolh aute residu”. E a hijut que, “aguesta naua iniciativa de remassada de papèr e carton a coma objectiu deishar es ièrles de contenedors a disposicion complèta des usatgèrs, atau coma facilitar eth reciclatge”.

Des deth govèrn deth Conselh Generau se vò hèr incís en besonh de melhorar es donades de reciclatge, qu’eth passat an 2019 sigueren d’un 24,64% ena selectiva (luenh deth 41,80% dera mieja catalana e, encara mès, deth 50% qu'establís era Comission Europèa entar an 2020) e un 4,82% dera organica.

Es otèls, restaurants e comèrci de Les e Bossòst que se volguen híger ad aguesta iniciativa, auràn d’enviar un corrèu electronic ara adreça [email protected] o ben telefonar ath 973641801, en tot indicar eth nòm der establiment, eth tipe de negòci e era adreça.

HÒNT: CONSELH GENERAU D'ARAN

Laura Rodríguez