Es gessudes de Marcha Nordica de Vielha e Mijaran contunhen pendent es mesi de noveme e deseme

11/11/2019

Pendent aguesta tardor, es amants dera Marcha Nordica an era escasença de contunhar en tot gésser a practicar aguest espòrt pes montanhes de Vielha e Mijaran. Deuant era nauta participacion qu'aguesta activitat a pendent tot er an, er Ajuntament de Vielha e Mijaran a decidit alongar es gessudes des grups de dijaus (Healthy) e de dissabte (Social) entàs mesi de noveme e deseme.

Per un costat, eth grup Healthy, contunharà en tot auer gessudes toti es dijaus, enquiath pròplèu 19 de deseme. Es gessudes s'amien a tèrme entre es 18:00 e es 20:00.

D'aute biais, tanben se manten en foncionament eth grup Social, que s'amie a tèrme toti es dissabtes, a compdar deth 9 de noveme enquiath pròplèu 21 de deseme. Aguestes gessudes, que son fòrça mès exigentes, començaràn entàs 09:30 e finalizaràn ath torn des 13:30.

Coma ei abituau, aguesta activitat ei totaument gratuïta e era gessuda e era  arribada se produsís ena plaça dera glèisa de Vielha, a on es participants comencen era activitat damb eth coordinador dera Marcha Nordica.

“Aguesta tardor, des der Ajuntament de Vielha e Mijaran volem contunhar en tot aufrir es gessudes de Marcha Nordica, pr'amor qu'ei ua des activitats esportives estrelha deth nòste municipi. Cada an fòrça gent s'apunte e participe enes gessudes qu'auem programades, e per açò auem decidit seguir damb es grups de dijaus e dissabte”, comente eth dusau tinent d'alcalde e còsso d'espòrts, Alberto López. E hig que “era Marcha Nordica ei ua grana escasença entà compartir ua estona d'espòrt damb amics e familha, en tot amassar espòrt damb natura”.

HÒNT: AJUNTAMENT DE VIELHA E MIJARAN

 

Laura Rodríguez