Er Institut d’Estudis Aranesi a presentat es darrères publicacions en Institut d’Estudis Catalans

09/07/2019

Er Institut d’Estudis Aranesi-Acadèmia Aranesa dera Lengua Occitana (IEA-AALO) presentèc eth darrèr diuendres dia 5 de junhsèga es darrères publicacions dera Acadèmia ena sedença der Institut d’Estudis Catalans (IEC) en Barcelona.

Er acte que compdèc damb era participacion deth president Institut d'Estudis Aranesi, Jusèp Loís Sans e deth president der Institut d’Estudis Catalans, Joandomènec Ros, servic tà presentar eth Dicionari e era Gramatica der aranés, era Gramatica der estandard der occitan, eth Vocabulari ortografic der aranés, eth Vocabulari des espòrts de nhèu, entre d'autes.

Ena presentacion tanben assistic Ester Franquesa, directora generau de Politica Lingüistica dera Generalitat de Catalonha; M. Teresa Cabré, presidenta dera Seccion Filologica der IEC; Jèp de Montoya, president dera Seccion Aranesa der IEA-AALO; Rosa Maria Salgueiro, secretària der IEA-AALO; Miquèu Segalàs, vocau der IEA-AALO, Jacme Taupiac, Claudi Balaguer, Joan Salas-Lostau, Maria Elvira Riu, Lordes España e Bernat Arrous, entre d'auti.

Pendent er acte, Patrici Pojada, membre dera Seccion estandard der Institut d’Estudis aranesi-Acadèmia aranesa dera lengua occitana e membre dera Seccion Istorico-Arqueologica der Institut d’Estudis Catalans, aufric ua charrada jos eth títol de "Robèrt Lafont e Catalonha", ena commemoracion der An Robèrt Lafont que se celèbre enguan.

Er an 2019 a estat declarat pera Generalitat de Catalonha coma "An Robèrt Lafont" a l'escasença deth detau aniversari dera sua mòrt. Robèrt Lafont ei considerat coma ua des mès granes figures istoriques der occitanisme. Siguec un intellectuau occitan e mès particularaments lingüista, escrivan, istorian, especialista dera literatura e teoric politic.

Entà acabar era presentacion des darrères produccions dera Acadèmia aranesa, es academics der IEA-AALO e der IEC mantengueren ua jornada conjunta de trabalh ena Sala Puig e Cadafalch der Institut d’Estudis Catalans.

Hònt: Arténher

Clara Villar