Er IEA apròve eth redactat definitiu deth Diccionari der aranés

30/09/2019

Eth darrèr diuendres 27 de seteme es membres dera seccion aranesa der Institut d’Estudis Aranesi-Acadèmia aranesa dera lengua occitana aprovèren eth redactat definitiu deth Diccionari der aranés.

Es trabalhs deth Diccionari comencèren en deseme deth 2016 en tot complir era peticion des collectius educatius dera Val d’Aran e deth Conselh Generau d’Aran qu'encarguèren era sua elaboracion ara Acadèmia aranesa dera lengua occitana.

Eth Diccionari, qu'ara començarà eth procès d'edicion, a compdat entara elaboracion deth redactat damb era participacion de mès de 30 persones e recuelh es paraules mès emplegades  en aranés, atau coma eth vocabulari pròpi dera economia primària aranesa.

Entath president der IEA-AALO, Jusèp Loís Sans Socasau, "Un diccionari dera lengua ei er element basic d'ua acadèmia". Sans ahigec qu'"Un diccionari non s'acabe jamès, donques que prumèr mos cau explicar qu'era nòsta lengua existís e dempús decidir com ei e com serà en un futur, çò que provòque longues discussions sus era normalizacion".

Eth Diccionari que tanben s’articulará enes mieis digitaus servirà coma estrument de trabalh entà alumnes, educadors e era poblacion en generau.

HÒNT: IEA-AALO

Laura Rodríguez