ACTUALITAT
Vielha e Mijaran apròve provisionaument era regulacion des larèrs compartidi
29/09/2022
Eth Plen municipau balhe lum verda ara modificacion des Normes Subsidiàries e Complementàries de Planejament dera Val d’Aran, e ara aurà d’èster era Comission d’Urbanisme dera Val d’Aran qui ac apròve, abantes dera sua ratificacion finau
Eth plen ordinari der Ajuntament de Vielha e Mijaran d’aguest dijaus a aprovat provisionaument era modificacion des Normes Subsidiàries e Complementàries de Planejament dera Val d’Aran, entà regular es larèrs compartidi.
Actuaument non existís ua regulacion urbanistica en aguest airau. Se preten arténher eth sòn reconeishement coma un emplec admetut laguens des emplecs urbanistics includidi enes Normes Subsidiàries e Complementàries de Planejament dera Val d’Aran, atau coma definir es condicions d’emplaçament.
Actuaument non existís ua regulacion urbanistica en aguest airau. Se preten arténher eth sòn reconeishement coma un emplec admetut laguens des emplecs urbanistics includidi enes Normes Subsidiàries e Complementàries de Planejament dera Val d’Aran, atau coma definir es condicions d’emplaçament.
Damb aguesta aprobacion, se preten regular es licéncies d’abitatges toristics compartidi en Vielha e Mijaran entà cercar ua solucion que non afècte ara problematica dera manca de viuenda de loguèr qu’existís en municipi.
Es viuendes toristiques compartides favorissen er aument deth prètz deth loguèr des abitatges e dificulten er accès de familhes en mercat de loguèr. Ath delà, tanben supause ua problematica entad aquera gent que ven a trabalhar era sason d’iuèrn o d’estiu, donques que non tròben cases entà poder residir a causa deth gran còst economic. D’aguesta forma, autant trabalhadors coma empresaris se ven perjudicadi. Pendent er iuèrn, era Val d’Aran acuelh un gran nombre de professionaus entà poder corbir lòcs de trabalh imprescindibles enes servicis toristics qu’aufrís eth territòri. Ua problematica que s’ahig ara proliferacion des lotjaments d’us toristic existenti.En 2021 ja s’aprovèc ua moratòria coma un acte preparatòri, per’mor de, posteriorament, poder assumir e ordenar avientament en municipi de Vielha e Mijaran aguesta tipologia de lotjament toristic definida en Catalonha coma “llar compartida”, d’acòrd damb era regulacion establida peth Decrèt 75/2020, de 4 d’agost, de torisme de Catalonha.
“Aguesta modificacion des normes en relacion as viuendes toristiques compartides preten, prioritariament, garantir eth dret fonamentau der accès ara viuenda as vesins e vesies de Vielha e Mijaran a un prètz digne, en tot assegurar era abitabilitat, era convivéncia, e eth descans de tota era ciutadania”, comente eth baile de Vielha e Mijaran, Juan Antonio Serrano. E ahig que “ara trasladam aguest ahèr ara Comission d’Urbanisme dera Val d’Aran, coma pas prealable ara sua aprobacion definitiua”.
HÒNT: AJUNTAMENT VIELHA E MIJARAN
“Aguesta modificacion des normes en relacion as viuendes toristiques compartides preten, prioritariament, garantir eth dret fonamentau der accès ara viuenda as vesins e vesies de Vielha e Mijaran a un prètz digne, en tot assegurar era abitabilitat, era convivéncia, e eth descans de tota era ciutadania”, comente eth baile de Vielha e Mijaran, Juan Antonio Serrano. E ahig que “ara trasladam aguest ahèr ara Comission d’Urbanisme dera Val d’Aran, coma pas prealable ara sua aprobacion definitiua”.
HÒNT: AJUNTAMENT VIELHA E MIJARAN
Manu Moga