Eth passat diuendres, 11 de gèr, eth baile de Vielha e Mijaran, Juan Antonio Serrano, eth còsso d'Espòrts, Alberto López, e eth deputat provinciau, Francés Boya, s’amassèren en Madrid damb era Secretària d'Estat entar espòrt e Presidenta deth Conselh Superior d’Espòrts, Maria José Rienda, entà transméter quina ei era situacion actuau ena que se trape eth Palai de Gèu.

Rebrembam qu’er Ajuntament de Vielha e Mijaran se vedec obligat a barrar de forma indefinida era pista de gèu deth Palai eth passat mes de junh degut a ua grèu pana en sòn sistema de refrigeracion.

Cau ahíger tanben es dificultats qu’aguesta infraestructura trauèsse per çò que hè ath mantenement e inversions de besonh, motius pes quaus eth consistòri inicièc d’un temps ençà contactes damb diuèrses administracions entà sajar d’obtier era sua implicacion en mantenement deth Palai de Gèu, qu’actuauments depen integralaments der Ajuntament.

Enquiara era Deputacion de Lleida ei era unica administracion publica qu'a confirmat eth sòn compromís de collaboracion entara mantenença d’aguesta infraestructura.

Pendent era amassada damb era Presidenta deth Conselh Superior d’Espòrts se parlèc sus era problematica actuau deth Palai de Gèu autant a nivèu economic coma estructurau. Ath delà, s’insistic en besonh deth finançament per part d'autes administracions publiques entà assegurar era sua viabilitat  en futur.

S'estudiarà eth modèu de gestion entà créisher enquia un centre esportiu d'airau nacionau e de tecnificacion d'espòrts d'iuèrn e Rienda deishèc dubèrta era pòrta a ua possibla collaboracion der Estat en futur der equipament.

Aguesta implicacion der Estat serie plan importanta, pr'amor qu'actuaument se trabalhe en ua futura candidatura de Barcelona Pirenèus entà organizar uns Jòcs Olimpics d'iuèrn.

Eth baile de Vielha e Mijaran volec arregraïr “eth trabalh e gestions hètes peth deputat provinciau, Francés Boya, autant damb era pròpria Deputacion, coma damb era Secretaria d’Estat, gestions qu'an possibilitat qu'aguesta amassada s'age amiat a tèrme”. E a hijut que “trabalham entà arténher era maximala implicacion des administracions publiques en futur deth Palai de Gèu pr’amor que sabem qu’ei un equipament de prumèr orde deth nòste territòri e, en aguestes condicions, se hè fòrça complicat que depengue  exclusivament deth pressupòst municipau”.

Era volentat finau der Ajuntament de Vielha e Mijaran ei obtier aguesta implicacion publicaentà qu’eth Palai de Gèu sigue en condicions de sostenibilitat e mantenement avientes entàs pròplèus ans.

IMATGE: AJUNTAMENT DE VIELHA E MIJARAN