Solidaritat ena naua jornada de donacion de sang

26/03/2019

Era Val d’Aran a tornat a respóner damb exit ara crida dera Naua Jornada de Donacion de Sang, celebrada ager, 25 de març, en Palai d’Espòrts de Vielha coma dejà ei abituau, en orari des 4 dera tarde enquiàs 9 deth ser.

A diari eth Banc de Sang distribuís uns 1.000 productes sanguinis (plasma fresc, concentrats d’hematies e concentrats de plaquetes) as espitaus de Catalunya, sustot entà casi d’anèmia aguda o cronica, intervencions quirurgiques, tractaments oncologics e accidents grèus. Era sang e es sòns components an ua vida limitada e, per tant, entà assegurar-ne un estòc, cau qu’era donacion se convertisque en un abit.

Ena Val d’Aran, gràcies ara collaboracion e solidaritat des sòns poblants, era donacion de sang s’està tornant un costum tà fòrça gent.

Ei imprescindible mantier es donacions e a poder èster augmentar-les entà arribar a hèr front a toti es besonhs deth dia a dia des espitaus atau coma as possibles situacions d’emergéncia. Era donacion non compòrte cap risc entara salut deth donant e sonque demane ues menutes deth nòste temps. Pòt dar sang tota persona sana d’entre 18 e 70 ans e que pese mès de 50 quilòs.

Clara Villar