Er Ajuntament de Vielha e Mijaran auance damb eth desplegament deth Plan d'Igualtat d'Oportunitat entre Hemnes e Òmes de Vielha e Mijaran (2018-2021). Pendent es dies 5 e 6 de junh amie a tèrme ua formacion as sòns trabalhadors sus er emplec corrècte deth lenguatge non sexiste.

Aguesta formacion preten mostrar es errors abituaus que s'acostumen a hèr en moment de redactar quinsevolh tipe d'escrit o document, e que se pòden reprodusir en tot parlar, e d'aguesta manèra corregir-les e hèr-ne un emplec avient.

“Des der Ajuntament contunham en tot auançar ena potenciacion dera igualtat d'oportunitats entre genres, damb accions concrètes coma ei era formacion des trabalhadors dera administracion, en tot cercar arténher un modèl just de relacions sociaus entre hemnes e òmes”, afirme era còsso d'Accion Sociau, Maria Vergés.

Ena formacion aprenen a esvitar es usatges sexistes e androcentrics deth lenguatge, atau coma er usatge igualitari e non discriminatòri dera lengua entre òmes e hemnes, en tot garantir-lo e visibilizar as hemnes, qu'an estat discriminades tradicionaument en lenguatge.

Hònt: Ajuntament de Vielha e Mijaran