Eth govèrn der Estat francés ordenèc eth barrament dera termièra de França damb Espanha en pòrt deth Portilhon per aument considerable des amenaces terroristes en país vesin.

Aquest hèt a dificultat er abituau transit de gent entre era Val d'Aran e eth sud de França, en tot supausar grèus perjudicis entara economia de Bossòst.

En aguest sens, eth baile de Bossòst, Amador Marqués, a mostrat era sua preocupacion per aguest hèt e que des der Ajuntament de trabalhe damb es autoritats franceses entà trapar ua solucion. En aquest sens, Marqués manifestaue que "coma sabetz, compartim era preocupacion deth barrament dera termièra deth Portilhon, decretat hè uns mesi peth govèrn francés. Aguesta via ei de vitau importància entara mobilitat deth nòste territòri, des nòsti visitants e des desparières pròves esportiues qu'aquiu an lòc. Per açò, amiam un temps en tot insistir en restabliment dera normalitat transtermièra, cossent damb es protocòus de sanitat establidi, coma auem tostemp manifestat. En aguest sens, contunham de mantier contacte damb era Delegacion deth Govèrn d'Espanha en Catalonha, a qui arregraïsqui era sua complicitat entad aguesta peticion deuant eth govèrn francés, atau coma damb representants dera Communauté de Communes Pyrénées Haut Garonnaises e dera Subprefectura de Saint-Gaudens, qu'a atengut era nòsta demanda entà trasladar-la ara Prefectura de Haute-Garonne segontes es previsions de seguretat sanitària deth govèrn francés"


HÒNT:  AJUNTAMENT DE BOSSÒST