Era Val d’Aran dejà a tornat a víuer, coma cada 4 de deseme, ua naua edicion dera Hèsta de Santa Barbara, patrona des Pompièrs d’Aran. Ua celebracion que servís entà commemorar e restacar era importància d’aguest còs de seguretat.

Era hèsta estec presidida peth Sindic d’Aran, Carlos Barrera, eth Director Generau de Prevencion, Escandilhament d’Incendis e Salvament dera Generalitat, Juli Gendrau, e eth Conselhèr delegat de Pompièrs e Emergéncies, Joan Canalias.

Era jornada comencèc, coma tostemp, damb es tòcs de sirena des coches de Pompièrs, que s’enteneren en tota era Val d’Aran. Dempús d’açò, se procedic ara recebuda d’autoritats entà contunhar damb era missa en aunor a Santa Barbara ena Glèisa de Santa Maria de Mijaran. Ua missa fòrça emotiua, que comencèc en tot sauvar ua menuta de silenci pes pompièrs mòrti.

Er acte finalizèc, coma ei tradicion, en pròpi parc de Pompièrs, a on tant eth Sindic d’Aran, coma eth Conselhèr delegat de Pompièrs e eth Director Generau de Prevencion d’Incendis arregraïren as Pompièrs eth sòn gran e inestimable trebalh, destacant era importància qu’a era incorporacion de 21 naui efectius.

Eth Sindic destaquèc qu’era situacion politica que viu Catalonha a empedit méter en foncionament eth nau modèl de gestion integrau de Pompièrs e Emergéncies dempús de dus ans de negociacions entara sua implantacion. Barrera, mostrèc era sua esperança en que, un còp s’age nomentat eth nau govèrn dera Generalitat dempús des eleccions deth 21 de deseme, se pogue méter dejà en foncionament aguest projècte tan necessari entath còs de Pompièrs aranesi.

Sonque manque desirar qu’aguest nau modèl de gestion des Pompièrs, qu’ei un projècte collectiu centrat en aspècte uman dera estructura, sigue ua realitat ena pròplèu celebracion de Santa Barbara.